இரத்தின புகழேந்தி நூல்கள்

இரத்தின புகழேந்தி நூல்கள்
RATHINA PUGAZHENDI BOOKS

14 பிப்ரவரி, 2019

ஆந்திராவில் திருமணம்



மகளின் தோழிக்கு குண்டூரில் திருமணம். துணைக்கு செல்லவேண்டிய நிலை. திருமணம் இரவில்தான் . காலை நலங்கு. இது கொஞ்சம் வித்தியாசமாக நடைபெற்றது. பனை ஓலையால் ஆன பந்தலில் மணப்பெண்ணுக்கு நலங்கு வைத்தனர். வந்திருந்த அனைத்து பெண்களுக்கும் ஒருவர் காலில் மஞ்சள் பூசிவிட்டார், இன்னொரு பெண் கழுத்தில் சந்தனம் தடவினார், மற்றொரு பெண் நெற்றியில் குங்குமம் வைத்துவிட்டார். நலங்கு செய்தவர்களில் ஒருசிலர் மணமகளுக்கு ரவிக்கைத் துணியும் கொய்யாப் பழமும் அன்பளிப்பாக வழங்கினர். மணமகளுக்கு பக்கத்தில் ஒரு குழந்தையை அமர்த்தி அக்குழந்தைக்கும் அனைத்து சடங்குகளையும் செய்தனர். ஒவ்வொருவரும் மஞ்சள் பூசிய அரிசியை மணமகளின் தலையில் இட்டு வாழ்த்தினர். நிறைவாகப் பெண்கள் நலங்குப் பாடல்கள் பாடி பெண்ணை வீட்டுக்குள் அழைத்துச் சென்றனர்.

6 ஜனவரி, 2019

மினுசுதார் வீடு







முன்னுரை:
கடலூர் மாவட்டம் விருத்தாசலம் வட்டம் (தற்போது திருமுட்டம் வட்டம்) மருங்கூர் கிராமத்தில் மினுசுதார் வீதியில் அமைந்துள்ள 50 அடி நீளம், 34அடி அகலமுள்ள சுமார் நூறு ஆண்டுகளுக்கு முன்பு கட்டப்பட்ட சுற்றுக்கட்டு வீடாக அமைந்துள்ள மினுசுதார் வீடு, முழுக்க முழுக்க உள்ளூர் வளங்களை பயன்படுத்தி கட்டப்பட்ட வீடு ஆகும். அந்த வீடு நூறு ஆண்டுகளைக்கடந்தும் நிலைத்திருப்பதற்கான தொழில்நுட்பம் என்ன என்பதை இக்கட்டுரை ஆய்வு செய்கிறது.
பெயர்க் காரணம்:
மினுசுதார் வீடு என்பது மக்களால் சூட்டப்பட்ட பெயர் ஆகும். வீட்டு உரிமையாளர்களால் வைக்கப்பட்ட பெயர் அல்ல. அந்த வீட்டின் உரிமையாளரான குழந்தைவேல் காலிங்கராயர் ஆங்கிலேயர் ஆட்சி காலத்தில் கிராம முனுசீப் ஆக பணியாற்றியவர் என்பதால் அவர் வீட்டை மக்கள் முன்சீப்தாரர் வீடு என அழைத்துள்ளனர் அது காலப்போக்கிலும் பேச்சு வழக்கிலும் மினுசுதார் வீடு என தற்போதும் வழங்கப்பட்டு வருகிறது. இந்த வீடு அமைந்திருக்கும் தெரு மினுசுதார் வீதி என்றே அழைக்கப்படுகிறது. மினிஸ்ட்ரார் என்ற பதவி ஆங்கிலேயர் ஆட்சி காலத்தில் இருந்ததாகவும் அப்பதவியை அவர் வகித்ததால் அப்பெயர் வந்தது என்றும் குறிப்பிடுகின்றனர்.
வீடு அமைப்பு:
தெற்கு பார்த்து கட்டப்பட்ட ( தெக்கு பாத்த வீட்டுக்கு லெக்கு பாத்து காத்து வரும் என்பது நாட்டுப்புற வழக்கு) இவ்வீட்டின் படிக்கட்டுகளின் இருபுறமும் சுமார் 4 அடி உயரமுள்ள மதில் எழுப்பப்பட்டுள்ளது ( இது சிறு திண்ணை போல் அமைந்திருக்கும்) படிக்கட்டு முடியுமிடத்தில் நடைப் பகுதி நடையின் இரு புறமும் பெரிய திண்ணைகள் அமைந்துள்ளன. திண்ணை முடியுமிடத்தில் நுழைவாயில் அமைந்துள்ளது. சூரியப்பலகையில் அன்னக்கிளியும் யாளி உருவமும் செதுக்கப்பட்டுள்ளன. (யாளி உருவம் வீட்டில் இருக்கக் கூடாது என யாரோ கூற தற்போது அந்த உருவம் அகற்றப்பட்டுள்ளது) அருகாலின் இரு புறமும் சுவரில் விளக்கேற்றும் மாடங்கள் அமைக்கப்பட்டுள்ளன. அருகாலின் மேல் பலகை அமைப்பதற்கு ஏதுவாக இரு தண்டுகள் அமைக்கப்பட்டுள்ளன. அதன்மீது மந்தாங்கி பலகை அல்லது பந்தல் பலகை அமிந்துள்ளது. இது பாய் தலையணையை வைப்பதற்குப் பயன்படுத்தப் பட்டுள்ளது.  ஒற்றைக்கதவு நாதாங்கி உளதாழ்ப்பாளோடு அமைக்கப்பட்டுள்ளது. நுழைவாயிலைக் கடந்து உள்ளே சென்றால் கூடமும் தாழ்வாரமும் உள்ளன சதுர வடிவ உள் வாசலைச் (முற்றம்) சுற்றிலும் அமைதிருப்பது தாழ்வாரம் தாழ்வாரத்தின் வெளிப் பகுதியில் மூன்று அறைகள் உள்ளன. வீட்டின் பின் பகுதியில் சாரம் அமைத்து அதில் தோட்டத்து வாயில்படி அமைக்கப்பட்டுள்ளது.
கட்டுமானப்பொருள்கள்:
செங்கல்லும் களிமண்ணும் கொண்டு கட்டப்பட்டுள்ளது, பூவரசு, வேம்பு, பனை, மூங்கில் போன்ற மரங்களிலிருந்து முறையே அருகால், கதவு,விட்டம்,வாரை, கம்பி ஆகியவை செய்யப்பட்டுள்ளன. மேற்கூரை நாட்டு ஓடுகளால் அமைக்கப்பட்டுள்ளது.
வீட்டில் பின்பற்றப்பட்டுள்ள நுட்பங்கள்:
வீட்டின் சுவர்கள் 15 அடி உயரம் 2அடி அகலம் உள்ளன இவை கோடைக்காலத்தில் வெப்பத்தையும் குளிர்காலத்தில் குளிரையும் வீட்டுக்குள் கடத்துவதில்லை. எனவே எல்லா பருவங்களுக்கும் குடியிருக்க ஏற்ற வகையில் அமைக்கப்பட்டுள்ளது. ஓடுகள் ஒன்றின்மீது ஒன்றாக அடுக்கி வைக்கப்பட்டுள்ளதால் சூரிய வெப்பம் எளிதில் வீட்டுக்குள் தாக்காது. கோடைக்கலத்தில் மாலைப்பொழுதில் வீடு குளிர்ந்துவிடும். சன்னல்கள் ஏதும் இல்லை என்பதால் வெளிச்சமும் காற்றும் வரும் வண்ணம் சுவருக்கும் மேற்கூரைக்கும் இடையே விட்டம் அமைத்து இடைவெளி ஏற்படுத்தப்பட்டுள்ளது.தற்போது ஓடுகளுக்கு இடையே கண்ணாடிகள் அமைக்கப்பட்டு வெளிச்சம் கூடுதலாகக் கிடைக்கும்படி இக்கட்டுரையாளரின் தந்தை அமைத்துள்ளார். உள் வாசல் வழியாகவும் காற்றும் வெளிச்சமும் வரும். பனை வாரைகளை மட்காமலும் பூச்சித் தாக்காமலும் தடுக்கும் பொருட்டு உப்பனாற்றில் ஊரவைத்து பயன்படுத்தப்பட்டுள்ளன. மழை நாட்களில் வெள்ள நீர் வீட்டுக்குள் நுழையா வண்ணம் மிகவும் உயரமாகக் கட்டப்பட்டுள்ளது. (அந்த ஊரின் உயரமான வீடு இதுவே). நூறு ஆண்டுகளுக்கு முன்பு அவ்வூரை வெள்ளம் சூழ்ந்தபோது வீட்டின் உரிமையாளரின் வயலில் கத்தரி மேடு என்ற பகுதி மட்டும் நீரில் மூழ்காமல் இருப்பதைப் பார்த்து அந்த உயரத்திற்கு வீட்டை உயர்த்திக் கட்டியதாக குடும்பத்தில் தற்போது மூத்தவரான திரு. தனபால் கூறினார்.
மழைநீர் சேகரிப்பு:
முற்றத்தின் நான்கு முனைகளிலும் ஓடுகள் கூடுமிடத்தை கூடுவாய் என்று குறிப்பிடுகின்றனர். கூடுவாயில் உள்புறம் அமைக்கப்பட்டுள்ள ஓடுகள் மற்ற ஓடுகளைவிட அளவில் பெரிதானவை. மழை நாட்களில் கூடுவாய் வழியே அதிக அளவில் நீர் வாசலில் ஊற்றும். அந்த நீரை பெரிய கொப்பரைகளில் சேகரித்து துணி துவைக்க, பாத்திரம் விளக்க, குளிக்க என பலவகையில் பயன்படுத்துவது இந்த வீட்டின் நூற்றாண்டுகால வழக்கம். மழை நீர் தூய்மையான நீர் என்பதை இக்கட்டுரையாளர் குளித்தும் குடித்தும் அறிந்துகொண்டவர்.
கழிவுநீர் மேலாண்மை:
இவ்வீட்டில் கழிவுநீர் மேலாண்மை மிகச்சிறப்பாக பின்பற்றப்படுகிறது. முற்றத்திலிருந்து நீர் வெளியேறும் பொருட்டு கற்குழாய்கள் புதைக்கப்பட்டுள்ளன குளிக்கும் நீரும் பாத்திரம் விளக்கும் நீரும் இதன் வழியே வெளியேறும். அந்த நீர் தோட்டத்திலுள்ள தாவரங்களுக்கும் மரங்களுக்கும் பயன்படும். சமைக்கும்போது ஏற்படும் கழுநீர், கஞ்சித்தண்ணி ஆகியவற்றை அடுப்பங்கரையிலுள்ள கழுநீர்ப் பானையில் சேகரித்து அவை ஒவ்வுருநாளும் முற்றத்திலுள்ள தொட்டிப்பானைக்கு மாற்றப்படும். தொட்டிப்பானை நிரம்பியதும் அந்த நீர் தொட்டியில் ஊற்றப்பட்டு மாடுகள் குடிக்க பயன்படுத்தப்படும். கழிவு நீர் ஒருபோடும் சாக்கடையாவதில்லை.
கழிவரை:
இந்த வீட்டில் கால் நூற்றாண்டுகளுக்கு முன்பு வரை கழிவரை இல்லை. ஆண்கள் விளை நிலங்களிலும் பெண்கள் குப்பை மேட்டிலும் காலைக் கடன்களைக் கழித்து வந்தனர். அதிகாலை எழும் வழக்கம் இருந்தமையால் இது ஒரு பிரச்சனையாக இருந்ததில்லை. இக்கட்டுரையாளர் நகரத்தில் திருமணம் செய்தமையால் வீட்டின் தோட்டத்தில் இவ்வூரின் முதல் கழிவரையைக் கட்டினார். இன்று கழிவரை இல்லாத வீடுகள் இவ்வூரில் இல்லை.

உள்ளூர் வளங்கள்:
இந்த வீடு கட்டுவதற்கு தேவையான கட்டுமானப் பொருள்கள் அனைத்தும் உள்ளூர் வளங்களைப் பயன்படுத்தி கட்டப்பட்டுள்ளது என்பதே இதன் சிறப்பு. இன்று வீடு கட்டுவதற்கு அனைத்துப் பொருள்களும் ( கல்,கருங்கல்,இரும்பு, மரம்,சிமெண்ட்) நகரத்திலிருந்து வாகனங்கள் மூலம் கொண்டு வரப்படுகின்றன. இவ்வீட்டுக்குத் தேவையான செங்கல், ஓடு ஆகியவற்றை உள்ளூரிலேயே சூளை அமைத்து தயாரித்துள்ளனர். மரங்களை தோட்டத்திலிருந்து வெட்டி உள்ளூரிலேயே அதனை விட்டமாகவும் பலகையாகவும் அறுத்துள்ளனர். பலகை அறுப்பத்தற்காக கிணறு போன்ற  நிரந்தர அமைப்பு  ஊரில் இருந்துள்ளது. செங்கற்களை புளிக்க வைத்த களிமண் கொண்டு கட்டி சுவர் எழுப்பியுள்ளனர்.
புதுப்பித்தல்:
இவ்வீட்டில் நான்கு அல்லது ஐந்து ஆண்டுகளுக்கு ஒரு முறை ஓடுகளை மாற்றி அடுக்குவது வழக்கம் அப்போது சேதமடைந்திருக்கும் வாரைகளையோ கம்பிகளையோ மாற்றி அவ்வப்போது வீட்டினைப் பராமரித்து வந்துள்ளனர். இதனால் வீட்டின் ஆயுள்காலம் அதிகரிக்கிறது.மரபு வழி தொழில்நுட்பத்தின் தனித்தன்மையே பரமரிக்கும் வசதியுடன் அமைக்கப்பட்டிருப்பதும் ஒன்றாகும். சுமார் 70 ஆண்டுகளுக்கு முன்பு இவ்வீட்டின் உரிமையாளர் குழந்தைவேல் அவர்கள் உடல் நலமின்றி நீண்ட நாட்கள் படுக்கையில் விழுந்தமையால் சிறிது காலம் வீட்டைப் பராமரிக்காமல் விட்டுவிட்டார். அப்போது வீட்டின் பின் பகுதி சேதமடைந்தது. வீட்டின் மூத்த மகன் திரு.தனபால் அவர்களுக்கு அப்போது 15 வயது இருக்கும் அவர் அப்பாவின் மறைவுக்குப் பிறகு வீட்டின் பின் பகுதியை முற்றிலுமாக புதுப்பித்துள்ளார். சுமார் 25 ஆண்டுகளுக்கு முன்பு ஒரு மழைக்காலத்தில் வீட்டின சாரம் சரிந்து விட இக்கட்டுரையாளரின் தந்தை திரு.இரத்தினசபாபதி அவர்கள் சிமெண்ட் சுவர் எழுப்பி அதனை சரிசெய்தார். தற்போது வீட்டின் முன்பகுதியிலுள்ள நூறு ஆண்டுகளைக் கடந்த பனை வாரைகள் ஒவ்வொன்றாக மட்கி உதிரத்தொடங்கியுள்ளன. அத்னை மாற்றுவதற்கு பொருள்செலவு மிகுதியாகும் என்பதால் இவ்வீட்டை இன்னமும் தொடர்ந்து பராமரிக்கவேண்டுமா? என்று இக்கட்டுரையளரும் அவரின் சகோதரரும் கருதுகின்றனர்.

கூட்டுக் குடும்ப முறை:
இவ்வீட்டில் மூன்று சகோதரர்கள் தனித்தனியே வசித்தாலும் கூட்டுக்குடும்ப முறை பின்பற்றப்பட்டு வந்தது. பொங்கல் திருநாளன்று மூவரும் சேர்ந்தே முற்றத்தில் சூரிய வழிபாடு செய்வார்கள். நிலத்தில் பயிர் வைப்பதற்கும் வீட்டைப்பராமரிப்பதற்கும் மூத்தவரின் ஆலோசனைப்படி தம்பிகள் இருவரும் நடந்து வந்தனர். காலப்போக்கில் அவரவர் தனிக்குடித்தனம் சென்றதிலிருந்து சில ஆண்டுகளாக வீடு பராமரிப்பு வேண்டி நிற்கிறது. தொடந்து பராமரித்தால் இன்னும் பல ஆண்டுகள் இவ்வீடு நிலைத்திருக்கும்.
முடிவுரை:
மரபுவழி தொழில்நுட்பம் உள்ளூர் வளங்களைப் பயன்படுத்திக் கட்டப்பட்டதால் சுற்றுச்சூழலுக்கு உகந்ததாக அமைந்துள்ளது. தொடர்ந்து பராமரிக்கும் வண்ணம் அமைந்துள்ளதால் வீட்டின் ஆயுள் அதிகரிக்கிறது. நமது தட்ப வெப்பத்திற்கு ஏற்ற கட்டுமானமாகவும் அமைந்துள்ளது. அப்போது மரங்கள் அதிக அளவில் கிடைத்ததால் நிறைய மரங்களைப் பயன்படுத்தியுள்ளனர். மரங்களை தொடர்ந்து வளர்ப்பதும் பாதுகாப்பதும் தேவைப்படும்போது வெட்டுவதும் மீண்டும் மரங்களை வளர்ப்பதும் அவர்களின் வாழ்க்கை முறையாக இருந்துள்ளது. அந்த மரபில் வந்த இக்கட்டுரையாளர் வீடு கட்டுவதற்காக 10 மரங்களை வெட்டினாலும் இன்று 500 மரங்களை வளர்த்து வருகிறார். இப்படி இயற்கை சம நிலையை ஒவ்வொருவரும் பின்பற்றினால் சுற்றுச்சூழல் காப்பாற்றபடும் என்பது திண்ணம்.
தகவலாளர்கள்:
1.திரு.கு.தனபால், 82, மருங்கூர், திருமுட்டம் வட்டம், கடலூர் மாவட்டம், 2.12.2018
2.திரு.கு.ராசலிங்கம்,78, மருங்கூர், திருமுட்டம் வட்டம், கடலூர் மாவட்டம், 9.12.2018
3.திரு.அ.ராமலிங்கம்,85, விருத்தாசலம், கடலூர் மாவட்டம்,10.12.2018
4.திரு. வேலாயுதம், 65,தச்சர், விருத்தாசலம்,12.12.2018

8 அக்டோபர், 2018

காந்தியின் கல்விக்கொள்கைகள்




            காந்தியின் பல கொள்கைகள் இன்றும் சிலரால் பின்பற்றப் பட்டாலும்,  கடுமையான விமர்சனங்களை முன் வைத்து காந்தியக் கொள்கைகளை எதிர்ப்பவர்களும் உண்டு. ஆனால் காந்தியின் கல்விக் கொள்கைகளை நம் நாடு கண்டுகொள்ளமல் விட்டது நமக்கு மிகப்பெரிய இழப்பு என்றுதான் கூறவேண்டும். காந்தியின் ஆதாரக் கல்விக் கொள்கை நம் மண்ணுக்காக சிந்தித்தது. நமக்கான தற்சார்பை வலியுறுத்தியது. முதல் பிரதமரான நேரு இக்கொள்கையை வளர்த்தெடுத்திருந்தால் நம் நாட்டுக் கல்விமுறை மற்ற நாடுகளுக்கு முன்னுதாரணமாக அமைந்திருக்கும். ஆனால் நேரு அறிவியல் தொழில்நுட்பம் ஆகிய கொள்கைகளுக்கு முன்னுரிமை கொடுத்து ஆதாரக் கல்வித்திட்டத்தை நழுவ விட்டார்.
கல்வி குறித்து காந்தியின் விளக்கம்: 
            கல்வி என்பது பாட நூல்கள் வாயிலாகப் பெறுவது என்கிற எண்ணம் பல பெற்றோர்களிடம் நிலவுகிறது. இந்த சிந்தனையை காந்தி மறுதலித்தார். பாட நூல்கள் மூலமாகவே அனைத்தையும் கற்பித்துவிடலாம் எனில், ஆசிரியர்களின் சொற்களுக்கு மதிப்பற்றுப் போய்விடும். பாட நூல்களை மட்டும் கற்பிக்கும் ஓர் ஆசிரியர், அவரது மாணவர்களிடத்தில் சுயசிந்தனையை விதைக்க முடியாது” என்றார்.
ஒருவர் கற்கும் கல்வி அவர் வாழ்க்கைக்கு உதவிடும் வகையில் அமைய வேண்டும் என்பதை வலியுறுத்தினார். அதனால்தான்  ‘வாழ்க்கைக்கான கல்வி; வாழ்க்கை மூலம் கல்வி; வாழ்க்கை முழுவதும் கல்வி’ என்பதை  காந்தி வலியுறுத்தினார்.  காந்தியக் கல்வியின் அடிப்படையே, தனி மனிதர்களைச் சமுதாயத்துக்குப் பயனுள்ளவர்களாக மாற்றுவது என்பதேயாகும்.
காந்தியக் கல்வியின் கூறுகள்
காந்தியக் கல்வி ஆறு முதன்மைப் பகுதிகளைக் கொண்டது.
1)ஏழாண்டு ஆதாரக் கல்வியை இலவசமாக அரசே தரத்தோடு வழங்க வேண்டும்.
2) ஆதாரக் கல்வியானது முழுக்க முழுக்கத் தாய்மொழிவழிக் கல்வியாக இருக்கவேண்டும். 3)கைத்தொழில் மூலமோ, ஆக்கப்பணி மூலமோ கல்வி கற்றுத்தரப்பட வேண்டும்.
4) பள்ளியின் சட்ட திட்டங்களிலிருந்து தாங்கள் கற்க வேண்டிய தொழில் உட்பட மாணவர்களே தீர்மானித்து சுயக்கட்டுப்பாட்டுடன் ஒரு சமூகமாகப் பள்ளியை வழிநடத்துவார்கள்.
5)தங்களது சூழலோடு பொருந்துகிற கல்வி 
6)குடிமைப் பயிற்சி. நாட்டின் உயர்ந்த லட்சியங்களாகக் காந்தி கருதிய மதச்சார்பின்மை, வாய்மை, நேர்மை, பொது வாழ்வியல், சமுதாயப் பங்கேற்பு, அகிம்சை வழியில் உரிமைகளைப் பெறும் வழிகளை அறிதல் என அவரது கல்வி விரிவடைகிறது.
            இவை அனைத்துமே இன்றைக்கும் சமூகத்திற்கு பயனுள்ளவையாக, தேவைப் படுவனவாக உள்ளன என்பது வியப்பளிக்கும் உண்மை. இவற்றையெல்லாம் கொள்கை அளவில் மட்டும் கூறி விட்டுவிடாமல்  நடைமுறைப்படுத்தி சோதித்தும் பார்த்தார் காந்தி.
காந்தியின் கல்விச் சோதனைகள்:
காந்தியின் முதல் கல்விச் சோதனை தென்னாப்பிரிக்காவில் டால்ஸ்டாய் பண்ணை ஆசிரமத்தில் தொடங்கியது. தென் ஆப்பிரிக்காவிலிருந்து 1915 இல் இந்தியா திரும்பியவர் அன்றைய இந்தியக் கல்வித் திட்டத்தை ஆய்வுக்கு உட்படுத்தியதினார். அதன் விளைவாக, புதிய கல்வித் திட்டத்தை உருவாக்கினார். அதன்படி 1917 இல் அகமதாபாத்தில் தன்னுடைய அடிப்படைக் கல்வி மற்றும் புதிய கல்வி எனும் கொள்கைகளின்படி புதிய பள்ளிகளைத் தொடங்கினார். இதே போன்று 1921 இல் குஜராத் வித்யா பீடம் என்ற பல்கலைக்கழகத்தை நிறுவினார்.  விடுதலைப்போராட்டம் தீவிரமான காலத்தில் சேவாகிராமத்தில் வாழ்ந்தபோது, ‘ஹரிஜன்’ இதழில் நாட்டின் கல்வி குறித்து விரிவான ஒரு கட்டுரையை காந்தி எழுதினார். அதில் கல்விமுறையின் பலவீனங்களைப் பின் வருமாறு பட்டியலிட்டிருந்தார்.
·         நமது மரபுக்கும் பண்பாட்டுக்கும் முரண்பட்டதாக இந்த மெக்காலே குமாஸ்தா கல்வி உள்ளது.
·         இந்தக் கல்வி, குழந்தையை நேரடியான சமுதாயச் சூழ்நிலையிலிருந்தும் உடல் உழைப்பிலிருந்தும் பிரித்துவிடுகிறது.
·         கற்றவர்களைத் தனி இனமாக, பிரிவாக இன்றைய கல்வி உருவாக்கிவிட்டது.
·         அரசு மற்றும் தனியாருக்குப் பணியாளர்களாக மாணவர்களை மாற்றுவதற்கான பயிற்சியை மட்டுமே இன்றைய கல்வி  வழங்குகிறது.
·         மாணவர்களின் மனத்தில் சமுதாய உணர்வு இன்றி சுயநல தனிமனித உணர்வு புகுந்துவிட்டது.
·         ஒரு நூற்றாண்டாகத் தொடரும் இந்த அந்நியர் கல்வியில் தொடக்கப் பள்ளி என்பது எந்த முன்னேற்றமுமின்றி வதங்கிவிட்டது.
·         கல்வித் திட்டத்தின் பெரும்பகுதி வாழ்க்கைக்குப் பயன்படாததாக வீணானதாக உள்ளது.
·         பொதுமக்கள் கல்வி முன்னேற்றம் பற்றி இன்றைய கல்வி எண்ணிப்பார்ப்பதே கிடையாது.
·         இயந்திர முறையில் ஒரே மாதிரி கல்வியை அனைத்துக் குழந்தைகளுக்கும் - அவரவர் தேவை உணராமல் வழங்குகிறார்கள்.
·         கல்விமுறையும் தேர்வுகளும் கல்வியை மாணவர்களின் உள்ளத்தில் பயத்தை உருவாக்கிப் பெரிய சுமையாகவே மாற்றிவிடுகிறது.
என்று இந்தியக் கல்வி குறித்து கடுமையான அதே நேரத்தில் உண்மையான குற்றச்சாட்டுகளை அக்கட்டுரை முன் வைத்தது.
பின்னர் காந்தி 1937 அக்டோபர் 22 இல் வார்தாவில் தேசிய கல்வி மாநாட்டை கூட்டினார். அது இந்தியத் தேசியக் கல்வி மாநாடு என்று அழைக்கப்படுகிறது. கல்வியாளர் டாக்டர் ஜாகிர் ஹுசைன் தலைமையில் இந்தியக் கல்வி குறித்து முடிவுசெய்ய ஒரு குழுவும் அமைக்கப்பட்டது. வார்தா கல்வித் திட்டம் அல்லது ஆதாரக் கல்விக் கொள்கை அந்த கல்விக் குழுவால் பரிசீலித்து முன்மொழியப்பட்டது. பிறகு வர்தாவிலும் செகாவோனிலும் சர்வோதய மாதிரிப் பள்ளிகள் தொடங்கப்பட்டன. காந்தியின் மரணத்திற்குப் பிறகு அடிப்படை கல்வி மற்றும் முன்-அடிப்படை கல்விப் பள்ளிகள் உருவாக்கப்பட்டன.
மாற்றுக் கல்வியின் தேவை:
            நடுவண் அரசு அமைத்த தேசிய திட்ட ஆணையம் பல அடிப்படைகளில் காந்தியின் அடிப்படை கல்வி பார்வைக்கு எதிர்ப்பைப் தெரிவித்தது. நேருவின் அரசின் பார்வையானது நாட்டை தொழில்மயமாக்குவதையும், மையப்படுத்தப்பட்ட திட்டமிட்ட பொருளாதாரத்தையும் கொண்டதாக இருந்ததால், இதில் காந்தியின் 'ஆதாரக் கல்வி' அல்லது சுய-ஆதரவு பள்ளிகளுக்கு இடமின்றி போனது. அறிவியல் மற்றும் தொழில்நுட்பம் ஆகியவற்றுக்கு முக்கியத்துவம் தர அறிவுஜீவிகளாளலும், அரசியல் தலைவர்களாளும் வலியுறுத்தப்பட்டதால் நவீன கல்வி என்று கருதும் இன்றைய கல்விமுறை நம் நாட்டில் பின்பற்றப் படுகிறது. ஆனால் மீண்டும் நம் கல்விமுறை மாற்றத்தை நோக்கி பயணிக்க வேண்டிய தேவை எழுந்துள்ள நிலையில் காந்தியின் கல்விக்கொள்கைகள் நமக்கு உறுதியாகத் தேவைப்படும்.

நன்றி: குங்குமச்சிமிழ் கல்வி வேலை வழிகாட்டி


1 மே, 2018

சிறுவர் விளையட்டுகள்




1.அம்புலி
நபர்கள்: இருவர்
விளையாட்டு முறை:அழும் குழந்தைகளுக்கு விளையாட்டு காட்டுவது உண்டு. குழந்தையை காலில் கிடத்தி விளையாட்டு காட்டுவதுதான் அம்புலி என்று நாட்டுப்புற மக்கள் குறிப்பிடுவர். பிள்ளைத்தமிழ் இலக்கிய உறுப்பான அம்புலி குழந்தையின் 15 ஆம் மாதத்திற்கு உரியது. இப்பருவத்தில் குழந்தையோடு விளையாட வரும்படி நிலாவை அழைப்பது மரபு.நாட்டுப்புற அம்புலியில் குழந்தையை படத்திலுள்ளவாறு அமர்த்தி கீழ்க்கண்டுள்ள பாடலைப்பாடி விளையாட்டு காட்டுவர்.பெரியவர் பாடலைப்பாட குழந்தையும் பின்பற்றிக்கூறுவதாக விளையாட்டு தொடரும்.
அம்புலி அம்புலி எங்க போன?
ஆவாரங்காட்டுக்கு
ஏன் போன?
குச்சி ஒடிக்க
ஏன் குச்சி?
குழி நோண்ட
ஏன் குழி?
பணம் பொதைக்க
ஏன் பணம்?
மாடு வாங்க
ஏன் மாடு?
சாணி போட
ஏன் சாணி?
ஊடு மொழுவ
ஏன் ஊடு?
பிள்ளைகள் வளர
ஏன் பிள்ளைகள்?
ஆத்து மணலுல... அஞ்சி வெளையாட...
கோரப்பாயில... கொஞ்சி வெளையாட...
முடிவு: பாடல் முடிந்ததும் விளையாட்டு நிறைவுபெறும்

பயன்கள்: இவிளையாட்டின் மூலம் குழந்தைகள் கேட்கும் திறனும் பேசும் திறனும் அதிகரிக்கிறது. நமது கிராமப்புற பண்பாடு பழக்கவழக்கங்களையும் குழந்தைகள் அறிந்துகொள்ள உதவுகிறது.

2.சரணா
நபர்கள்: குறைந்தது 8 பேர்முதல் 10 பேர்வரை
விளியாடும் முறை:சரணா சரணா, சரணாத்தி, கிளித்தட்டு என வெவ்வேறு பெயர்களால் குறிப்பிடப்படும் ஆட்டம். செவ்வக வடிவில் நிலத்தில் கோடு கிழித்து அதனை நீள வாக்கில் இரண்டாகப் பிரித்து ஒரு அணியிலுள்ள உறுப்பினர்களின் எண்ணிக்கைக்கேற்ப குறுக்குக் கோடுகளை அமைத்துக்கொள்வர். உத்தி பிரிந்து ஒரு அணியினர் கோடுகளில் நின்று கொள்ள எதிரணியினர் நிற்பவர்களிடம் அடி படாமல் குறுக்குக் கோடுகளைக் கடந்து சென்று உப்பெடுத்து வரவேண்டும். அணித் தலைவனுக்குக் கிளி என்று பெயர் அவன் முதல் கோட்டில் நிற்க பிற உறுப்பினர்கள் மற்ற கோடுகளில் நிற்பர். இலங்கையிலும் தமிழர்களிடையே கிளித்தட்டு ஆடும் பழக்கம் உள்ளது. கிளி சரணா, உப்பு சரணா என இரு வகை உண்டு. முல்லை நிலத்தில் தோன்றியது கிளி சரணா, நெய்தல் நிலத்தில் தோன்றியது உப்பு சரணா எனக் கருதப்படுகிறது.
முடிவு: விரும்பும்போது முடித்துக்கொள்வர்
பயன்: தான் சார்ந்த சமூகத்திற்கு தன்னால் இழுக்கு நேராமல் பார்த்துக் கொள்ள வேண்டும் என்னும் பண்பாட்டினை சிறுவர்களுக்குக் கற்றுத் தருகிறது.

3.கோட்டிப்புள்
நபர்: இருவர்
ஆடும் முறை: மழைக்காலம் முடிந்து கோடைக்காலம் தொடங்கும் நாட்களில் விளையாடுவது. கில்லித்தண்டு, கிட்டிப்புள் என்றும் வழங்கப்படுகிறது. இரண்டு முதல் பத்து பேர் வரை விளையாடுவர். சிறு குழியில் புள் எனப்படும் சிறு மரத்துண்டினை வைத்து கோட்டியால் கெந்திவிட்டு புள் விழுந்த இடத்திற்குச் சென்று அப்புள்ளை கோட்டியால் தட்டி எழுப்பி அடித்து விட எங்கு போய் வாழுகிறதோ அங்கிருந்து மீண்டும் மீண்டும் அது போல் செய்து இறுதியில் எதிரணியினர் புள் கிடந்த இடத்திலிருந்து கேலியான குறிப்பொலி எழுப்பியபடி ஆட்டம் தொடங்கிய இடத்திற்கு வந்து மீண்டும் ஆட்டத்தைத் தொடர வேண்டும். முதலில் புள்ளைக் கெந்தும் போது எதிரணியினர் புள்ளைப் பிடித்துவிட்டால் கெந்தியவர் ஆட்டமிழப்பார்.
முடிவு: விரும்பும்போது முடித்துக்கொள்ளலாம்.
பயன்கள்: ஊருடன் ஒத்துவாழக் கற்றல், திறமைக்கேற்ற வாய்புபு கிடைக்கும் என்ற நம்பிக்கையை ஏற்படுத்துதல்.

4.பம்பரம்
நபர்கள்:இருவர் முதல் 10 பேர் வரை ஆடலாம்
ஆடும் முறை:சிறு கயிற்றைக்கொண்டு பம்பரத்தைச் சுழற்றி ஆடுவது பம்பரவிளையாட்டு. இதில் இரண்டுவகை ஆட்டங்கள் உண்டு. வல்லா,காட்டுக்குத்து எனக்குறிப்பிடுவர். வட்டத்துக்குள் பமபரத்தை வைத்து ஆடுவது வல்லா. இரு எல்லைக் கோடுகள் வரைந்து அதற்குள் பம்பரத்தை விட்டு கைகளில் ஏந்தி ஆடுவது காட்டுக் குத்து எனப்படும். பமபரம் பற்றிய குறிப்புகள் இராமாயணம், கந்தபுராணம், பிரபுலிங்கலீலை ஆகிய நூல்களில் காணக்கிடைக்கின்றன.
முடிவு: விரும்பும்ப்போது முடித்துக்கொள்ளலாம்.
பயன்கள்: தனித்திறன், தன்னம்பிக்கை வளர்கிறது.


5.அம்பால் விளையாட்டு
நபர்கள்: இருவர் முதல் 10 பேர் வரை விளையாடலாம்
ஆடும் முறை: 7 ஆம் எண் வடிவக் குச்சியைக்கொண்டு ஆடும் ஆட்டம். ஒருவன் இரு கைகளாலும் குச்சியை உயர்த்திப் பிடித்துக்கொள்ள மற்றொரு சிறுவன் அதனைத் தள்ளிவிட கீழே விழுந்து கிடக்கும் அம்பால் குச்சியை மற்ற சிறுவர்கள் முடிந்தவரைத் தள்ளிச்செல்வதே இவ்வாட்டத்தின் முக்கி அம்சம். தன் குச்சியைத் தள்ளிச் செல்பவர்களைத் தொட்டு ஆட்டமிழக்கச் செய்யவேண்டும். ஆட்டமிழப்பவர் தன் குச்சியை உயர்த்திப் பிடித்து நிற்க மீண்டும் மீண்டும் தொடரும். அதற்கு முன்பு கீழே கிடக்கும் குச்சியை அதற்குரியவன் கையிலெடுத்துக்கொண்டு ஆட்டம் தொடங்கிய இடத்திற்கு ஓடி வரவேண்டும். அப்போது அவனுக்குப் பின்னால் வரும் சிறுவர்கள் கீழ்க்கண்ட பாடலைப் பாடுவர்.
எங்க வீட்டு நாய் தெரு பொறுக்கப் போச்சுகல்லால அடிச்சேன்காலொடிஞ்சி போச்சு
முடிவு: இரு அணிகளிலும் சமமான வெற்றி கிடைத்ததும் முடித்துக்கொள்வர்.
ஆட்டத்தின் பயன்: சிறுவர்களிடம் மனதை ஒரு நிலைப்படுத்தும் ஆற்றலையும் தன்னம்பிக்கையையும் வளர்க்கிறது.

6.கண்ணாமூச்சி
நபர்கள்: 3 முதல் 10 பேர் வரை
விளையாடும் முறை: சிறுவர் சிறுமியர் என இரு பாலரும் விளையாடும் விளையாட்டு. ஒரு சிறுவனின் கண்ணை மற்றொருவன் பொத்த பிறர் ஒளிந்து கொள்ள ஒளிந்திருப்பவர்களில் ஒருவரைக் கண்டறிவது விளையாட்டு. கண்ணைப்பொத்தியிருப்பவனோடு கீழ்க்கண்டவாறு உரையாடல் நடைபெற்று முடிந்த பிறகு கண்ணைத்திறந்துவிடவேண்டும்.

உரையாடல்:
கண்ணாமூச்சி காதடைப்பு
உங்க வீட்டுல என்னா சோறு?
நெல்லு சோறு

ஈ உழுந்துதா, எறும்பு உழுந்துதா?
எறும்பு உழுந்துது
எடுத்துட்டு சாப்பிட்டியா, எடுக்காம சாப்பிட்டியா?
எடுத்துட்டு சாப்பிட்டேன்
காட்டுக்கு போயி ஒரு சிங்கம், ஒரு புலி,
ஒரு கரடி எல்லாம் புடிச்சிகிட்டு வா...
கண்பொத்தி ஆடும் மரபு சங்ககாலந்தொட்டே தமிழர்களிடமிருந்திருப்பதைக் கீழ்க்கண்ட பாடல்கள் உணர்த்துகின்றன.
சிலம்பு கமழ் காந்தள் நறுங்குலை அன்ன
நலம் பெறு கையின் என் கண் புதைத்தோயே! (ஐங்குறுநூறு)
கண் புதையாக் குறுகிப் பிடிக்கை அன்ன...(அகநாநூறு)
முடிவு: அனைவரையும் கண்டறிந்ததும் ஒரு ஆட்டம் முடிவுக்கு வரும்
பயன்கள்: சிறுவர்களுக்கே உரிய கண்டறியும் ஆற்றலை இவ்விளையாட்டு வளர்க்கிறது.

7.குலை குலையா முந்திரிக்காய்
நபர்கள்: 10 பேர்
ஆடும் முறை:சிறுவர் சிறுமியர் என இரு பாலரும் ஆடும் ஆட்டம். விளையாட்டில் கலந்துகொள்பவர்கள் வட்டவடிவில் அமர்ந்திருக்க ஒருவர் மட்டும் கையில் வைத்திருக்கும் துணியைச் சுழற்றிக்கொண்டு வட்டத்தைச் சுற்றி பாட்டு பாடியபடி ஓடிவரும்போது அமர்ந்திருப்போரில் யாரேனும் ஒருவர் பின்னே அத்துணியை போட்டுவிட்டு ஓடுவார். துணி யாருக்குப்பின்னால் கிடக்கிறதோ அவர் எழுந்து ஓடி துணி போட்டவரைப் பிடிக்கவேண்டும் இல்லையேல். இவர் யாரேனும் ஒருவர் பின்னால் துணியைப்போட ஆட்டம் இவ்வாறு தொடர்ந்து கொண்டிருக்கும்.
பாடல்: கொல கொலயா முந்திரக்காய்

நரிய நரிய சுத்தி வா
கொள்ளையடிப்பவன் எங்கிருக்கான்
கூட்டத்திலிருக்கான் கண்டுபிடி.
முடிவு: விரும்பும்போது முடித்துக்கொள்வர்
பயன்கள்: கை, கால், மூட்டு மற்றும் உடல் ஆகியவை வலுப்பெறும். மன மகிழ்ச்சி கிடைக்கும் நினைவாற்றல் வளரும்
8.கல்பாரி
நபர்கள்: 5 பேர்
ஆடும் முறை: பாரி என்றால் கொட்டுமுழக்குடன் புரியும் இராக்காவல் என்று பொருள். தரையில் செவ்வக வடிவில் கோடு கிழித்து அதனுள் குறுக்கு நெடுக்காக இரு கோடுகள் அமைத்து கோடுகள் வெட்டுமிடத்தில் ஒரு சிறு வட்டம் வரைந்து அதில் நான்கு கற்களை வைத்து கட்டத்திற்கு ஒருவர் வீதம் நான்கு பேர் நிற்க நடுக்கோட்டில் ஒருவன் நின்று கட்டத்திற்குள்ளிருப்போர் கற்களை எடுத்துச்சென்று விடாமல் காவல் காக்கும் விளையாட்டு கல்பாரி. காவலாளியிடம் அடி படாமல் கற்களை எடுத்துவிட்டால் ஆட்டத்தில் வென்றதாக பொருள்.
முடிவு: அனைவரும் ஆட்டம் இழக்கும்போது முடிவுக்கு வரும்
பயன்கள்: உழைத்து பொருளீட்ட வேண்டும், ஈட்டிய பொருளில் தம் தேவை போக எஞ்சியதை பிறருக்கு கொடுத்து உதவுதல் ஆகிய பண்புகளைச் சிறுவர்களிடம் வளர்க்கிறது.

9.சில்லி விளையாட்டு
நபர்கள்: இருவர்
ஆடும் முறை: மழைக்காலங்களில் சிறுமியர் ஆடுவது. இருவர் சேர்ந்து ஆடுவதால் தலா ஐந்து கட்டங்களை நிலத்தில் வரைந்து உடைந்த மண் பானைத்துண்டுகளை சல்லியாக்கி (இதுதான் சில்லி என்று மாறியிருக்க வேண்டும்) கட்டத்துக்குள் வீசி ஒற்றைக் காலால் நொண்டியடித்தபடி கட்டத்தினுள்ளிருக்கும் சில்லியை மிதித்து அதனை அடுத்த கட்டத்துக்குக் காலால் எத்தித் தள்ளவேண்டும் அது போல் ஒவ்வொரு கட்டத்திலும் வீசி விளையாடுவர்.இது போல் நான்கு சுற்றுகள் வெற்றிகரமாக முடித்தால் ஒரு பழம் பழுத்ததாகக் கூறி கடைசி நான்காவது கட்டத்தில் ஒரு பெருக்கல் குறி வரைந்துகொள்வது வழக்கம். வெற்றிக்கனிகளை முதலில் பெறுபவர் ஆட்டத்தில் வெற்றி பெற்றவராகக் கருதப்படுகிறார்.
முடிவு : ஒருவர் வெற்றி பெற்றால் ஒரு ஆட்டம் முடியும். இருவரும் சேர்ந்து முடிவெடுக்கும்போது ஆட்டத்தை முடித்துக்கொள்வார்கள்.

பயன்கள்: தன்னம்பிக்கை, விடாமுயற்சி, கடின உழைப்பு ஆகிய பண்புகளைச் சிறுவயதிலேயே இவ்விளையாட்டு ஏற்படுத்துகிறது.
10.ஏழாங்காய் விளையாட்டு
நபர்கள்: இருவர்
ஆடும் முறை:சிறுமியர் ஆடுவது. ஏழு கற்களைக்கொண்டு ஆடுவதால் இப்பெயர். ஒரு காயைக் கையில் வைத்துக்கொண்டு மற்றகாய்களைச் சிதறவிட்டு கையிலிருக்கும் காயை மேலே விட்டு கீழிருக்கும் காயை எடுத்தபடி மேலிருந்து வருவதையும் பிடிக்க வேண்டும்.
பாடல்: ஆலெல பொறுக்கி
அரசெல பொறுக்கி
கிண்ணம் பொறுக்கி
கீரிபுள்ள தாச்சி
தாச்சின்னா தாச்சி
மதுர மீனாட்சி.
முடிவு: இருவரும் விரும்பும்போது முடிவுக்கு வரும்
பயன்கள்: கை,வாய், கண் ஆகிய முப்புலன்களை ஒருங்கிணைத்து பயன்படுத்தும் ஆற்றல் வளர்கிறது


11.ஓரி விளையாட்டு
நபர்கள்: 5 முதல் 10 பேர் வரை
ஆடும் முறை: நீரில் ஆடும் விளையாட்டு. நிலத்தில் ஓடிப் பிடித்து விளையாடுவதைப்போன்று நீரில் மூழ்கி நீந்திச்சென்று பிடிக்கவேண்டும்.ஆட்டத்தின் தொடக்கத்தில் பாடப்படும் பாடல்:

ஆத்துல கெண்ட புடிச்சன்
எல்லாருக்கும் குடுத்தன்
எங்க வெங்கடேசனுக்கு மட்டும் குடுக்கலே.
முடிவு: உடல் சோரும்போது முடியும்
பயன்கள்: நீச்சலை எளிதாகக் கற்றுக்கொள்ளலாம், யூகித்து அறியும் ஆற்றல் வளரும்.

12.சடுகுடு விளையாட்டு
நபர்கள்: 10 முதல் 20 பேர் வரை
ஆடும் முறை: தமிழர்களின் வீர விளையாட்டு. சங்க கால போர் முறைகளின் எச்சமாகக் கருதப்படுகிறது. வெட்சித் திணையின் துறைகளாகக் கூறப்படும் 'பசுக்கூட்டங்களைக் கவர்தலுக்கு எழுகின்ற பேரொலி, பகைவேந்தரின் புறத்திடத்து சென்று சூழ்ந்து தங்குதல், தங்கிய பின்னர் சூழப்பட்ட ஊரை அழித்தல், எதிர்ப்பவர்களைப் போரிட்டு மீளுதல்' ஆகிய கூறுகளோடு பின் வரும் சடுகுடு ஆட்ட அலகுகள் ஒப்பு நோக்கத் தக்கவை. அவை முறையே,' ஆட்டத்தில் பாடப்படும் பாடலின் பேரொலி, எதிரணியின் எல்லைக்குள் சென்று ஆடுதல், அங்குள்ளவர்களைத் தொட்டு ஆட்டமிழக்கச் செய்தல், பிடிக்க வருபவர்களிடமிருந்து மீளுதல்'. ஆகியனவாகும்.
பாடல்:
 1. நாந்தாண்டா ஒப்பன்
நல்லமுத்து பேரன்
வெள்ளி பெரம்பெடுத்து
வெளையாட வரேண்டா
தங்கப் பெரம்பெடுத்து
தாலி கட்ட வரேண்டா
வரேண்டா... வரேண்டா...
2. சப்ளாஞ்சி அடிக்கவே
சறுக்கிட்டு உழவே
ஒப்பனுக்கும் ஓயிக்கும்
ஒரு பணம் தெண்டம்
தெண்டம்... தெண்டம்...
3. தோத்த கடைக்கு நான் வரேன்
தொட்டு பார்க்க நான் வரேன்
கருவாட்டு முள்ளெடுத்து
காது குத்த நான் வரேன்.
முடிவு: தொடங்கும்போதே எத்தனை ஆட்டம் என்று முடிவு செய்து விளையாடுவர். நான்கு முறை விளையாண்டதும் முடிப்பது வழக்கம்.
பயன்கள்: வீர உணர்வு வளரும், சவால்களை எதிர் கொள்ளக் கற்பிக்கிக்கிறது, தமிழரின் போர் மரபுகளை அறிய உதவுகிறது.


13.ஆபியம் விளையாட்டு
நபர்கள்: 6 பேர்
ஆடும் முறை: ஆறு சிறுவர்கள் சேர்ந்து ஆடும் விளையாட்டு இது. பகல் இரவு என இரு பொழுதுகளிலும் ஆடுவர். ஒருவர் குனிந்து நிற்க மற்றவர்கள் குனிந்து நிற்பவரின் முதுகில் கை வைத்து ஒரு புறமிருந்து மறுபுறத்திற்குத் தாண்ட வேண்டும். தாண்டும்போது தாண்டுபவரின் கால்கள் குனிந்திருப்பவரின் மீது படக்கூடாது, பட்டால் ஆட்டமிழப்பர்.ஆட்டத்தில் பாடப்படும்
பாடல்:
ஆபியம்...
மணியாபியம்...
கிருணாபியம்
நாகனார் மண்ணைத்தொடு
 ராஜா பின்னால ஒத குடு.
முடிவு: அனைவரும் விரும்பும்போது முடித்துக்கொள்வர்
பயன்கள்: எச்சரிக்கை உணர்வை வளர்க்கும், எதையும் தாங்குகிற வலிமையைத் தரும்.

14.திம்பி விளையாட்டு
நபர்கள்: இருவர்
ஆடும் முறை: சிறுமியர் விளையாடுவது. முன்னிரவு நேரத்தில் ஆடுவர்.
பெயர்க்காரணம்:தும்பி சில நேரங்களில் ஓரிடத்திலிருந்து கொண்டு கரகரவெனச் சுற்றும்.அதனால் இவ்விளையாட்டு 'தும்பி சுற்றுதல்' என்று சூட்டப்பட்டு, பின்னர் 'திம்பி சுற்றுதல்' என்று திரிந்திருக்கலாம்.(நன்றி:முனைவர் ஆறு.இராமநாதன்)
திம்பி சுற்றும்போது பாடப்படும் பாடல்கள்:
1. எண்ண இல்ல சீப்பு இல்ல
ஊதா பொடவ இல்ல
உன்னக் கூட நான் வல்ல


2. நீயும் நானும் சோடி
நெல்லு குத்த வாடி
ஆத்து மணல அள்ளிபோட்டு
அவுலு இடிக்க வாடி
முடிவு: இருவருக்கும் உடல் சோர்வு ஏற்படும் வரை விளையாடுவ்ர்.
இவ்விளையாட்டின் பயன்: தோழமை உணர்வை வளர்க்கிறது,சமுதாயத்தில் இணைந்து செயல்படும் பண்பை குழந்தைகளிடம் வளர்க்கிறது,திம்பிப்பாடல்கள் ஆண் பெண் உறவு நிலை, சிற்றூர் பொருளாதாரநிலை ஆகியவற்றை வெளிப்படுத்துகிறது. மேலும் விரிவாக அறிய படிக்கவும் கிராமத்து விளையாட்டுகள் (விகடன் வெளியீடு)

15.குண்டு(கோலி)
விளையாட்டு முறை: பேந்தாகுண்டு, குழி குண்டு என இரு வகையுண்டு. தரையில் சதுரம் வரைந்து அதனுள் குண்டை வைத்து ஆடுவது பேந்தாகுண்டு. குழியினுள் அடித்து ஆடுவது குழி குண்டு. பேந்தாவிலிருக்கும் குண்டுகளை கையிலுருக்கும் குண்டால் குறிபார்த்து அடித்து வெளியேற்ற் வேண்டும். அது எவ்வளவு தூரம் செல்கிறதோ அங்கிருந்து எதிரணியில் உள்ளவர்கள் கைவிரல்களை மடக்கி மணிக்கட்டுகளால் அக்குண்டுகளை பேந்தாவை நோக்கி தள்ளிவரவேண்டும். இவ்வாறு மூன்றுமுறை விளையாடுவது ஒரு ஆட்டம் ஆகும்.
நபர்கள்: எண்ணிக்கை வரையறை இல்லை
முடிவு: மூன்று ஆட்டம் விளையாடியதும் முடிவுபெறும்.
பயன்கள்: பொருள்களைக் கையாளும் திறன், விரல்களை ஒருங்கிணைக்கும் திறன், குறிதவறாமல் அடிக்கும் திறன், மனதை ஒருமுகப்படுத்தும் பண்பு ஆகியவற்றை சிறுவர்கள் பெறுகின்றனர்.

16.காயே கடுப்பங்காய்
விளையாட்டு முறை: இரு அணிகளாகப் பிரிந்து எதிரெதிரே அம்ர்ந்துஒண்டு கைகளை முதுகுப்பக்கம் வைத்துக்கொள்ளவேண்டும் அணிக்கு ஒரு தலைவர் அமர்ந்திருப்பவர்களின் பின்னால் நிற்கவேண்டும். ஒரு அணித்தலைவர் ஏதேனும் ஒரு சிறு பொருளை கையில் வைத்துக்கொண்டு பாடல் பாடிக்கொண்டே ஒரு உறுப்பினரின் கைகளில் இலாவகமாக ஒளித்து வைக்கவேண்டும். எதிரணியில் இருப்பவர் யார் கைகளில் பொருள் வைக்கப்பட்டுள்ளது என்பதைக் கண்டுபிடிக்க வேண்டும்.
நபர்கள்: 10 நபர்கள்
முடிவு: விளையாடும் நபர்கள் விரும்பும்போது முடித்துக் கொள்ளலாம்.
பாடல்: காயே கடுப்பங்காய்
          கஞ்சி வார்த்த நெல்லிக்காய்
          உப்பே புளியங்காய்
          ஊறுகா போட்ட நெல்லிக்காய்
          கள்ளன் வறான் கதவ சாத்து
          வெள்ளன் வறான் விளக்கேத்து
          திடுமுடு திடுமுடு வாய்தா பணம்…
பயன்கள்: உழவர்களிடம் அடாவடியாக வரி வசூலிப்பதை பகடி செய்கிறது இந்த ஆட்டம். அரசியல் விழிப்புணர்வு, இடர் மேலாண்மை, குழுவாக இணைந்து செயல்படுதல் ஆகியவற்றை இவ்விளையாட்டின் மூலம் குழந்தைகள் கற்கின்றனர்.
17.கிச்சு கிச்சு தாம்பாளம்:
நபர்கள்: இரண்டு பேர்
விளையாட்டு முறை: இருவரும் எதிரெதிராய் அமர்ந்து இருவருக்கும் இடையில் மணலைக் குவித்து வைக்கவேண்டும். ஒருவர் தன்னிடமுள்ள சிறு குச்சியை மணலுக்குள் ஒளித்துவைக்க வேண்டும். மற்றவர் எந்த இடத்தில் ஒளித்துவைக்கப்பட்டுள்ளது என்பதை தன் இரு உள்ளங்கைகளாலும் வைத்து சுட்டிக்காட்டாவேண்டும். சரியாக காண்பித்தால் அவர் அதுபோல் ஒளித்து வைக்க எதிரிலிருப்பவர் கண்டறிய வேண்டும்.
முடிவு: விரும்பும்போது முடித்துக்கொள்வர்.
பாடல்:
          கிச்சு கிச்சு தாம்பாளம்
          கீயாக் கீயா தாம்பாளம்
          மச்சு மச்சு தாம்பாளம்
          மாயா மாயா தாம்பாளம்
பயன்கள்: கண்டறியும் ஆற்றல், கூர்ந்து நோக்கும் திறன், சிந்தனையை ஒருமுகப்படுத்தும் பண்பு ஆகியனவற்றை வளர்க்கிறது.




15.குண்டு(கோலி)
விளையாட்டு முறை: பேந்தாகுண்டு, குழி குண்டு என இரு வகையுண்டு. தரையில் சதுரம் வரைந்து அதனுள் குண்டை வைத்து ஆடுவது பேந்தாகுண்டு. குழியினுள் அடித்து ஆடுவது குழி குண்டு. பேந்தாவிலிருக்கும் குண்டுகளை கையிலுருக்கும் குண்டால் குறிபார்த்து அடித்து வெளியேற்ற் வேண்டும். அது எவ்வளவு தூரம் செல்கிறதோ அங்கிருந்து எதிரணியில் உள்ளவர்கள் கைவிரல்களை மடக்கி மணிக்கட்டுகளால் அக்குண்டுகளை பேந்தாவை நோக்கி தள்ளிவரவேண்டும். இவ்வாறு மூன்றுமுறை விளையாடுவது ஒரு ஆட்டம் ஆகும்.
நபர்கள்: எண்ணிக்கை வரையறை இல்லை
முடிவு: மூன்று ஆட்டம் விளையாடியதும் முடிவுபெறும்.
பயன்கள்: பொருள்களைக் கையாளும் திறன், விரல்களை ஒருங்கிணைக்கும் திறன், குறிதவறாமல் அடிக்கும் திறன், மனதை ஒருமுகப்படுத்தும் பண்பு ஆகியவற்றை சிறுவர்கள் பெறுகின்றனர்.

16.காயே கடுப்பங்காய்
விளையாட்டு முறை: இரு அணிகளாகப் பிரிந்து எதிரெதிரே அம்ர்ந்துஒண்டு கைகளை முதுகுப்பக்கம் வைத்துக்கொள்ளவேண்டும் அணிக்கு ஒரு தலைவர் அமர்ந்திருப்பவர்களின் பின்னால் நிற்கவேண்டும். ஒரு அணித்தலைவர் ஏதேனும் ஒரு சிறு பொருளை கையில் வைத்துக்கொண்டு பாடல் பாடிக்கொண்டே ஒரு உறுப்பினரின் கைகளில் இலாவகமாக ஒளித்து வைக்கவேண்டும். எதிரணியில் இருப்பவர் யார் கைகளில் பொருள் வைக்கப்பட்டுள்ளது என்பதைக் கண்டுபிடிக்க வேண்டும்.
நபர்கள்: 10 நபர்கள்
முடிவு: விளையாடும் நபர்கள் விரும்பும்போது முடித்துக் கொள்ளலாம்.
பாடல்: காயே கடுப்பங்காய்
          கஞ்சி வார்த்த நெல்லிக்காய்
          உப்பே புளியங்காய்
          ஊறுகா போட்ட நெல்லிக்காய்
          கள்ளன் வறான் கதவ சாத்து
          வெள்ளன் வறான் விளக்கேத்து
          திடுமுடு திடுமுடு வாய்தா பணம்…
பயன்கள்: உழவர்களிடம் அடாவடியாக வரி வசூலிப்பதை பகடி செய்கிறது இந்த ஆட்டம். அரசியல் விழிப்புணர்வு, இடர் மேலாண்மை, குழுவாக இணைந்து செயல்படுதல் ஆகியவற்றை இவ்விளையாட்டின் மூலம் குழந்தைகள் கற்கின்றனர்.